Ciidamada Badda Maraykanka ayaa bilaabay dabagal markab shidaal qaada ah oo ku sugan biyaha caalamiga ah ee u dhow Venezuela, xilli ay sii kordhayso xiisadda ka taagan gobolkaasi.
Maraykanka ayaa horay u qabsaday laba markab oo shidaal qaada, kuwaas oo mid ka mid ah la qabtay Sabtidii, taas oo sii xoojisay tallaabooyinka ka dhanka ah maraakiibta la xiriirta Venezuela.
Dabagalka Axaddii dhacay ayaa la xiriiray markab lagu tilmaamay mid ka tirsan maraakiibta “qarsoon” ee cunaqabateynta saaran, kuwaas oo loo adeegsado ka fogaanshaha sharci-darrada ah ee cunaqabateynta lagu soo rogay Venezuela, sida uu sheegay sarkaal Mareykan ah. Sarkaalka ayaa sidoo kale xusay in markabku uu watay calan been ah, isla markaana uu jiro amar maxkamadeed oo lagu farayo in la soo qabto.
Washington ayaa ku eedeysay dowladda Venezuela in dakhliga ka soo baxa dhoofinta shidaalka loo adeegsado maalgelinta dambiyada la xiriira daroogada, halka Venezuela ay qabashada maraakiibta shidaalka ku tilmaantay “xatooyo iyo afduub.”
Tallaabooyinkan ayaa imanaya kadib markii Madaxweynaha Mareykanka Donald Trump uu toddobaadkii hore amar ku bixiyay in la xannibo maraakiibta shidaalka ee cunaqabateynta saaran ee galaya ama ka baxaya Venezuela.
