Maxkamadda Racfaanka Gobolka Galgaduud ayaa goordhow xukun dil toogasho ah ku riday laba eedeysane oo loo haystay kiiska naxdinta lahaa ee dilka hooyo iyo saddex gabdhood oo ay dhashay, kuwaas oo bishii hore lagu dilay deegaanka hoostaga Qaayib.
Labada eedeysane ee la xukumay ayaa kala ah Cabdi Cismaan Cabdullaahi Galad iyo Axmed Xuseen. Sidoo kale, eedeysane Ayub Maxamed Cabdi ayaa lagu xukumay xabsi dhan 5 sano.
Goobta dhageysiga ayaa si weyn loo adkeeyay, iyadoo ka qeybgalaya xubno ka tirsan maamulka gobolka, saraakiil ciidan, ehelada dhibbanayaasha, iyo qoysaska eedeysanayaasha.
Kiiskan ayaa noqday mid si weyn ay shacabka Soomaaliyeed ula socdaan, gaar ahaan bulshada Galgaduud, maadaama uu ka mid yahay dhacdooyinkii ugu murugada badnaa ee sanadkan la diiwaangeliyay.
Maxkamaddu waxay sheegtay in xukunka uu yahay mid caddaalad u horseedaya qoyska dhibbanayaasha iyo bulshada ku nool Galgaduud.