Guddiga Madaxa-Bannaan ee Doorashooyinka Qaranka iyo Soohdimaha (GMDQS) ayaa maanta, 24-ka November 2025, kulan ku yeeshay xaruntiisa dhexe, waxaana shir-guddoomiyay Guddoomiye ku-xigeenka Guddiga. Kulanka kadib, Guddigu wuxuu soo saaray go’aan ku saabsan muddada loo qabtay soo gudbinta liisaska murashaxiinta Golaha Deegaanka ee degmooyinka Gobolka Banaadir.
Go’aankan ayaa yimid kadib markii Guddigu tixgeliyay laba arrimood oo muhiim ah:
-
Codsiyo rasmi ah oo ka yimid qaar ka mid ah Ururrada Siyaasadda, kuwaas oo dalbaday waqti dheeri ah si ay u dhammeystiraan liisaskooda murashaxiinta.
-
Baahida loo qabo in liisaska soo gudbaya ay noqdaan kuwo dhammaystiran oo si buuxda u waafaqsan shuruudaha sharciga ee ku cad Xeerka Doorashooyinka Qaranka.
Guddigu wuxuu go’aamiyay in laba toddobaad oo dheeri ah lagu daro jadwalkii hore. Waqtigan cusub wuxuu ka bilaabanayaa 26-ka November, waxaana uu ku egyahay 10-ka December.
Ugu dambeyn, GMDQS wuxuu ogeysiiyay dhammaan Ururrada Siyaasadda in liisaska kama dambaysta ah lagu soo gudbiyo waqtiga cusub ee loo kordhiyay, balse aan wax kordhin kale jiri doonin.