Ugu yaraan 32 qof ayaa ku dhintay markii goob macdan kobalt ah ku burburtay deegaanka Kalando ee degmada macdanta Mulondo ee Jamhuuriyadda Dimuqraadiga ah ee Congo (DRC).
Shilkan wuxuu dhacay kadib markii rasaas ay fureen shaqaalaha amniga ee ilaalinayay aaggaasi ay sababeen in macdan qodayaal sharci-darro ah ay ku dhacaan god furan oo halkaas ku yaallay.
Wasiirka Arrimaha Gudaha ee Gobolka Lualaba, Roy Kaumba Mayonde, oo ka hadlayay dhacdada Axaddii, ayaa sheegay in aaggaas si rasmi ah looga mamnuucay sababo la xiriira roobab culus iyo khatarta dhul-go’a, hase yeeshee macdan qodayaal sharci-darro ah ay ku qasbanaadeen inay gudaha u galaan.
Wasiirku wuxuu intaas ku daray in burburka uu dhacay kadib markii ay macdan qodayaashu isticmaaleen buundo ku meel gaar ah oo ay iyagu sameysteen si ay uga gudbaan kanaal ku yaalla goobta.
Mas’uuliyiinta gobolka ayaa xaqiijiyay in 32 meyd la helay, halka hawlgallada raadinta iyo samatabbixinta ay weli socdaan. Sawirro lagu baahiyay baraha bulshada ayaa muujinaya dad deegaanka ah oo si naxdin leh u daawanaya meydadka oo laga soo saarayo godka.
Dowladda ayaa ugu baaqday macdan qodayaasha yaryar inay ka faa’iidaystaan barnaamijyada tababarka iyo taageerada beeraha, si looga hortago masiibooyinka ka dhasha ku lug lahaanshaha macdan qodista sharci darrada ah.