Saddex qof ayaa la xaqiijiyay inay ku dhinteen kadib markii duufaanta Melissa, oo ah duufaantii ugu xooggan ee caalamka sanadkan, ay ku dhufatay jasiiradda Jamaica. Khubarada saadaasha hawada ee Mareykanka ayaa ka digay in duufaantani keeni karto “masiibo iyo xaalado nololeed” oo khatar ah.
Melissa oo ah duufaan Qaybta 5-aad ah — heerka ugu sarreeya ee cabbirka duufaannada — ayaa wata dabaylo gaaraya 175 mayl saacaddii (282km/h), taasoo Jamaica gelisay xaalad degdeg ah. Waxaa la sheegay in roobab culus, daadad xooggan iyo go’doon isgaarsiineed ay saameeyeen qaybo badan oo dalka ah.
Khubarada cimilada ayaa tilmaamay in Melissa laga yaabo inay noqoto duufaantii ugu xoog badnayd ee abid ku dhuftay Jamaica, iyadoo dowladda ay ku baaqday in dadka laga daadgureeyo deegaannada xeebaha ah, islamarkaana xarumaha gargarka ay fureen goobihii degdega ahaa.
Duufaantan ayaa hadda u jiheysan dhinaca waqooyi-galbeed, iyadoo saadaashu muujinayso in ay saameyn ku yeelan karto qaybo ka mid ah Cuba iyo xeebaha koonfureed ee Mareykanka maalmaha soo socda.
