Taliyaha Ciidanka Dhulka ee Ciidanka Qaranka Soomaaliyeed, Sarreeye Guuto Sahal Cabdullaahi Cumar (Jeneraal Khalid), ayaa kulan muhiim ah la qaatay dhiggiisa Nigeria, Taliyaha Ciidanka Nigeria, Sarreeye Guuto Usman Abdulmumin Yusuf, magaalada Kigali ee dalka Rwanda.
Kulanka labada hoggaamiye ee militariga ayaa diiradda lagu saaray xoojinta xiriirka iskaashiga ee ka dhexeeya ciidamada qalabka sida ee Soomaaliya iyo Nigeria. Wadahadalladu waxay diiradda saareen meelaha muhiimka ah ee istaraatiijiyadda, gaar ahaan hawlgallada ka hortagga argagixisada, is-weydaarsiga khibradaha dagaalka, iyo horumarinta dadaallada tababarka ciidamada.
Labada taliye waxay ku heshiiyeen inay ballaariyaan iskaashiga ka dhexeeya ciidamadooda, iyagoo qiray in labada dal ay la kulmaan cadow isku mid ah oo qaab kooxo argagixiso ah oo wadaaga astaamo isku mid ah. Waxay ku nuuxnuuxsadeen muhiimadda ay leedahay mideynta dadaalladooda lagu ciribtirayo walxahan doonaya inay carqaladeeyaan dalalkooda.
Isku-dubaridkan heerka sare ah waa qayb ka mid ah istaraatiijiyadda ballaaran ee Ciidanka Qaranka Soomaaliya si loo xoojiyo iskaashiga caalamiga ah ee amniga iyo la dagaallanka argagixisada.
Taliyaha Ciidanka Dhulka Xoogga Dalka Soomaaliyeed,
Sarreeye Guuto Sahal Cabdullaahi Cumar (Jeneraal Khaalid), ayaa ka qeybgalay madasha caalamiga ah ee taliyeyaasha ciidamada dhulka – Land Forces Commanders Symposium 2025, oo lagu qabtay magaalada Kigali ee dalka Rwanda.
Madashan oo ay kasoo qaybgaleen taliyeyaasha ciidamada dhulka ee dalal badan oo Afrika iyo caalamka ah, ayaa diiradda lagu saaray sidii loo mideyn lahaa aragtiyada hoggaanka, loo xoojin lahaa iskaashiga amniga, iyo kor u qaadista nabadda waarta ee gobolka iyo guud ahaan caalamka.
Jeneraal Khaalid oo khudbad ka jeediyay madasha ayaa sheegay in amniga iyo nabaddu ay ku dhismaan hoggaan mideysan, istaraatiijiyado casri ah, iyo iskaashi milatari oo xooggan, isagoo xusay in ay ka go’an tahay Ciidanka Xoogga Dalka Soomaaliyeed in ay ka mid noqdaan kuwa hoggaaminaya jihadaas cusub.
Madaxweynaha dowladda Federaalka Soomaaliya Xasan Sheekh Maxamuud ayaa Sarreya Guuto Sahal Cabdullaahi Cumar u magacaabay Taliyaha Ciidanka Dhulka ee ciidamada xoogga dalka Soomaaliyeed, halka Gaashaanle Dhexe Xasan Saalax Cabdi uu u magacaabay Taliyaha Ciidanka Gaarka ah ee Ciidanka Dhulka ee ciidamada xoogga dalka Soomaaliyeed.
Madaxweyne Xasan Sheekh Maxamuud ayaa taliyaashii hore ee Ciidanka Dhulka iyo Ciidanka Gaarka ah ee CXDS uga mahadceliyay, kuna bogaadiyay shaqadii wanaagsanayd ee ay soo qabteen ciidanka, Madaxweynaha ayaa kula dardaarmay Taliyaasha cusub gudashada waajibaadka loo idmaday iyo dardargalinta dagaalka dalka looga xoreynayo kooxda Al-shabaab.
