Qaar ka mid ah mas’uuliyiinta laga soo doortay magaalada Mandheera ee gobolka Waqooyi Bari ee dalka Kenya ayaa mar kale walaac xooggan ka muujiyay joogitaanka ciidamo ka tirsan maamulka Jubaland, kuwaas oo la sheegay inay dhex degeen shacabka magaalada.
Ciidamadan ayaa soo galay Mandheera muddo ku dhow bil, kaddib markii uu dagaal ka dhacay magaalada Beled-Xaawo ee xuduud la leh Mandheera, iyadoo labada dhinac ee dagaalamay ay kala yihiin ciidamada dowladda Federaalka Soomaaliya iyo kuwa kale.
Xildhibaan Xuseen Weytaan, oo ka mid ah wakiilada Bariga Mandheera, ayaa sheegay in joogitaanka ciidamada Jubaland uu dhibaato weyn ku hayo bulshada, isagoo xusay inay jirto cabsi iyo xasillooni darro ay dadka deegaanka la kulmayaan.
Mas’uuliyiinta Mandheera ayaa ku baaqay in si degdeg ah loo xaqiijiyo ammaanka magaalada, loona soo celiyo kalsoonida shacabka, isla markaana la joojiyo faragelinta ciidamada ajnebiga ah ee saameynta ku yeelaya nolosha dadka deegaanka.
