Dowladda Federaalka Soomaaliya ayaa ku dhawaaqday in ay soo iibsatay laba diyaaradood oo nooca Airbus A320 ah, kuwaas oo lagu wado inay ku duulaan magaca shirkadda qaranka ee Soomaali Airlines. Diyaaradahan ayaa la filayaa in ay howlgalaan muddo laba bilood gudahood ah.
Heshiiska ku saabsan iibsiga diyaaradaha ayaa si rasmi ah loogu saxiixay Xafiiska Ra’iisul Wasaaraha, iyadoo ay goob joog ka ahaayeen mas’uuliyiin ka tirsan dowladda.
Wasiirka Gaadiidka iyo Duulista Hawada, Mudane Maxamed Faarax Nuux, oo faahfaahin ka bixiyay heshiiska, ayaa sheegay in dowladda Soomaaliya ay heshiis kala iibsi ah la gashay shirkadda Lema Air Group, taasoo laga iibsaday diyaaradaha cusub.
“Waxaan maanta heshiis kala iibsi ah la billownay shirkad la yiraahdo Lema Air Group. Waxaanu ka iibinay laba diyaaradood oo ah Airbus A320, waxayna hawlgali doonaan muddo laba bilood gudahood ah,” ayuu yiri wasiirku.
Soomaali Airlines, oo ah astaan qaran oo muddo dheer ka maqneyd hawada dalka, ayaa dib u soo noolaaneysa, taasoo qeyb ka ah dadaallada dowladda ee lagu horumarinayo kaabeyaasha dhaqaalaha iyo isku xirka gudaha iyo dibadda dalka.
