Maamulka Jubbaland ayaa si adag uga hadlay dagaallada isdaba-joogga ah ee ka socda degmada Beledxaawo iyo deegaanka Doolow ee gobolka Gedo, isagoo si toos ah eedeyn ugu jeediyay Villa Somalia, gaar ahaan Madaxweynaha Federaalka Xasan Sheekh Maxamuud, in uu yahay maskaxda ka dambeysa weerarro lagu wiiqayo xasilloonida Jubbaland.
Warsaxaafadeed rasmi ah oo kasoo baxay Jubbaland ayaa lagu sheegay in ciidamo federaal ah oo ku sugan xerada UK ee duleedka Beledxaawo ay dhowr jeer weerarro ku qaadeen magaalada, iyagoo adeegsanaya diyaarado dagaal iyo hub culus. Weeraradaas, sida lagu sheegay bayaanka, waxay sabab u noqdeen barakac ballaaran, burbur hantiyadeed, iyo cabsida shacabka ee ku sugan magaalada.
“Waxay arrintani muujineysaa in Villa Somalia ay si toos ah u abaabulayso dagaallo siyaasadaysan oo lagu carqaladeynayo maamul-goboleedka Jubbaland,” ayaa lagu yiri warsaxaafadeedka.
Sidoo kale, Jubbaland waxay sheegtay in ciidamo kale oo fulinaya amarro toos ah oo ka yimid Villa Somalia ay xalay weerar ku qaadeen xarumaha ciidamada Jubbaland ee magaalada Doolow, taasoo sii hurisay xiisadda colaadeed ee gobolka Gedo.
Maamulka Jubbaland wuxuu si adag u dhaleeceeyay weerarradaasi, isagoo ku tilmaamay inay yihiin qorshe lagu waxyeelleynayo dowlad-goboleedyada, ayna la mid tahay hab-dhaqanka kooxda Al-Shabaab oo dhowaan la wareegtay magaalada Maxaas, taasoo Jubbaland ku tilmaantay tusaale muuqda oo ah “khatar siyaasadeed oo ka dhalan karta tallaabooyinka dowladda Federaalka.”
Ugu dambeyn, Jubbaland waxay caddeysay in ay ka go’an tahay difaaca shacabka iyo dhulka Jubbaland, isla markaana ay diyaar u tahay in ay ka hortagto qorshe kasta oo wax u dhimaya nabadda iyo xasilloonida deegaannadeeda.