Wasaaradda Arrimaha Dibadda ee Jamhuuriyadda Federaalka Soomaaliya ayaa warsaxaafadeed rasmi ah ku soo dhoweysay bayaanka taariikhiga ah ee ay Dowladda Faransiisku ku shaacisay damaceeda ah in ay si rasmi ah u aqoonsato Dowladda Falastiin.
Qoraalka kasoo baxay Wasaaradda ayaa lagu tilmaamay go’aanka Faransiiska mid geesinimo leh oo ku habboon marxaladdan xasaasiga ah, islamarkaana xoojinaya xaqa shacabka Falastiin u leeyihiin in ay masiirkooda ka tashadaan oo ay dhistaan dowlad madax-bannaan oo leh karaamo iyo qaranimo buuxda.
“Tani waa tallaabo geesinimo leh oo ku habboon waqtigan muhiimka ah, waxayna ka tarjumaysaa taageerada sii kordheysa ee beesha caalamka u muujinayso cadaaladda, nabadda, iyo xalka laba dowladood,” ayaa lagu yiri bayaanka Wasaaradda Arrimaha Dibadda Soomaaliya.
Dowladda Soomaaliya ayaa sidoo kale xustay in ay garab taagan tahay shacabka iyo dowladda Falastiin, ayna mar walba taageereyso dadaallada lagu gaarayo nabad waarta iyo dowladnimo xor ah oo ku saleysan xeerarka caalamiga ah.