Taliska howlgalka Midowga Afrika ee AUSSOM ayaa maanta shaaciyay in ciidamada iskaashanaya ee AUSSOM iyo Xoogga Dalka Soomaaliyeed (SNAF) ay si geesinimo leh u fashiliyeen weerar ay saaka waaberigii Al Shabaab ku qaadeen saldhigyo ciidan oo ku yaalla deegaanka Sabiid iyo Caanoole ee gobolka Shabeellaha Hoose.
Saldhigyadan ayaa ka mid ahaa goobihii muhiimka ahaa ee laga xoreeyay Al Shabaab bishii Juun ee sanadkan. Ciidamada AUSSOM iyo SNAF ayaa si degdeg ah uga falceliyay weerarka, iyagoo ku qasbay kooxda weerarka soo qaaday inay dib u gurtaan.
Intii uu dagaalku socday, waxaa la dilay tiro dagaalyahanno ka tirsan Al Shabaab, halka kuwo kalena ay dhaawacyo culus soo gaareen. Sidoo kale, waxaa gacanta lagu dhigay hub iyo saanad militari oo ay wateen weerarayaasha.
AUSSOM ayaa xaqiijisay in saldhigyadii la beegsaday ay weli si buuxda ugu sugan yihiin ciidamada huwanta, islamarkaana ay socdaan hawlgallo baaxad leh oo lagu baacsanayo kooxdii weerarka fulisay iyo shabakadaha la shaqeeya.
“AUSSOM waxay markale xaqiijinaysaa in shacabka deegaanka Sabiid-Anole iyo nawaaxigeeda la siin doono amni iyo ilaalin joogto ah. Howlgalladan waa qeyb ka mid ah dadaallada joogtada ah ee lagu wiiqayo kooxda Al Shabaab, si loo xaqiijiyo xasillooni waarta iyo dowladnimo xooggan,” ayaa lagu yiri qoraalka.
