Ciidanka Booliiska Soomaaliyeed ee saldhigga degmada Deyniile ayaa gacanta ku dhigay eedeysane Maxamed Cabdullahi Cali, kaasi oo lagu eedeeyay inuu si xun u jir dilay xaaskiisa, Khadro Cabdullahi Maxamuud haweeney u dhalatay Soomaaliya balse ka timid dalka Holland.
Falkan naxdinta leh ayaa si ballaaran uga dhex muuqday baraha bulshada, iyadoo si weyn looga dareemay caro iyo cambaareyn xooggan oo ay muujiyeen shacabka Soomaaliyeed.
War rasmi ah oo ka soo baxay booliiska ayaa lagu sheegay in eedeysanaha la horgeyn doono maxkamad si sharciga loogu qaado tallaabo waafaqsan dambiga uu geystay.
Sidoo kale, Ciidanka Booliiska ayaa ugu baaqay bulshada inay la shaqeeyaan hay’adaha amniga, si si wadajir ah loola tacaalo falalka xadgudubka ah ee ka dhanka ah haweenka iyo dadka nugul.
Booliiska waxay xaqiijiyeen inay ka go’an tahay la dagaallanka tacaddiyada noocan oo kale ah si loo sugo cadaaladda iyo amniga muwaadiniinta.