Agaasimaha Guud ee Hay’adda Socdaalka iyo Jinsiyadda (HSJ) Mudane Mustafa Duhulow iyo wafdi uu hoggaaminayo ayaa kulamo muhiim ah la yeeshay Madaxda Laamaha socdaalka iyo amniga dowladda Switzerland iyo mas’uuliyiin ka kala tirsan hay’adaha cadaaladda, Arrimaha dibedda, iyo Khuburo farsamo.
Agaasimaha Guud ayaa uga mahadceliyay dowladda Switzerland qalab ay dhawaan ugu deeqday HSJ Soomaaliya kaas oo loogu talo galay in lagu baaro dukumiintiyada socdaalka ee been abuurka ah, tababaro wax ku ool ah iyo wada shaqeynta dhow ee ka dhexaysa labada hay’adood, isagoo xusay in iskaashigan uu yahay mid miro-dhal ah oo wax ka taraya horumarinta adeegyada socdaalka.
Madaxda labada hya’adood ayaa kala saxiixday iskaashi lagu horumarinayo tayaynta adeegyada socdaalka ay ugu horeeyaan dhismaha kaabayaasha adeegyada socdaalka iyo horumarinta karaanka shaaqaalaha HSJ kuwaas oo xoojin doona aqoonsiga baasaboorka Soomaaliya oo ah astaan qaran oo muhiim u ah muwaadiniinta Soomaaliyeed, loona baahan yahay in la xoojiyo sumcadda iyo kalsoonida uu ku leeyahay caalamka.
Agaasimaha iyo Wafdigiisa ayaa waxa ay hay’adaha maareeya xuduudaha dalka Switzerland ay la wadeegaan khibradooda aqooneed iyo farsamo iyadoo lageeyay xuduuddaha dhulka iyo garoonada dalka si ay usoo arkaan teknologiyada iyo agab loo isticmaalo maareynta socdaalka. Wafdiga ayaa sidoo kale, waxa ay khibrad wadaag wada yeesheen hay’adda soo saarta baasaboorka Switzerland iyo aqoonsiyada dalka halkaas oo si qoto dheer looga hadlay sida kor loogu qaadi lahaa tayada baasaboorka Soomaaliga.
