Madaxweynaha Dowladd goboleedka Puntland, Mudane Siciid Cabdullaahi Deni, ayaa kulan muhiim ah la qaatay saraakiisha hoggaaminaysa howlgalka ka socda buuraleyda Calmiskaad, kaas oo lagu beegsanayo ciribtirka kooxaha argagixisada ee khatar ku haya amniga gobolka.
Kulanka oo ka dhacay xarunta Madaxtooyada Puntland, ayaa waxaa Madaxweynaha ku wehliyay Guddoomiye Ku-xigeenka Koowaad ee Golaha Wakiillada, Mudane Maxamed Baari Shire, lataliyeyaal sare oo Madaxweyneyaasha ka tirsan iyo saraakiil amni oo heer sare ah.
Saraakiisha howlgalka ayaa Madaxweynaha siiyay warbixin dhameystiran oo ku saabsan guulaha laga gaaray wejiyada hore ee howlgalka Calmiskaad, istaraatiijiyadaha la adeegsaday, iyo qorsheyaasha socda ee ku wajahan wajiga xiga oo la filayo inuu ka bilowdo buuraleyda Calmadow.
Madaxweyne Deni ayaa ku bogaadiyay ciidamada Puntland geesinimada iyo adkeysiga ay ku wajahaan kooxaha argagixisada, isagoo si gaar ah u ammaanay wada shaqeynta shacabka iyo sida ay u garab taagan yihiin ciidankooda. Wuxuu xusay in taageerada shacabka — gudaha iyo qurbaha — ay tahay tiir-dhexaadka guusha howlgalka.
Dhankiisa, saraakiisha ammaanka ayaa carrabka ku adkeeyay in howlgalka uu ku socdo si qorshaysan, islamarkaana lagu wajahan yahay ciribtir buuxa oo ka dhan ah kooxaha nabad diidka ah, si aysan mar dambe fursad ugu helin in ay ku dhuuntaan buuraleyda Puntland.
Dowladd goboleedka Puntland ayaa mar kale caddeysay sida ay uga go’an tahay in ay si buuxda u sugaan amniga deegaannadeeda, ayna meesha ka saaraan halista ay kooxaha argagixisada u keenayaan shacabka. Ujeeddadu waa in Puntland ay gaarto nabad waarta, xasillooni joogto ah, iyo dowladnimo xooggan oo ay shacabka oo dhan ka dhex muuqdaan.