Muqdisho – Dowladda Federaalka Soomaaliya ayaa si adag u cambaareysay dagaalka maanta ka dhacay magaalada Baladxaawo ee gobolka Gedo, kaas oo dhexmaray ciidamo kala taabacsan Dowladda Federaalka iyo Maamulka Jubbaland.
Warsaxaafadeed rasmi ah oo kasoo baxay Wasaaradda Amniga Gudaha ee Dowladda Federaalka ayaa lagu eedeeyay Madaxweynaha Jubbaland, Axmed Maxamed Islaam (Axmed Madoobe), in uu si toos ah uga dambeeyay weerar lagu qaaday xarumo dowladeed iyo saldhigyo ciidan oo ku yaalla Baladxaawo.
“Wasaaradda Amniga Gudaha waxay ka xuntahay, si adagna u cambaaraynaysaa fal dambiyeedka uu eedeysane Axmed Maxamed Islaam ka gaystay magaalada Beledxaawo… halkaas oo maleeshiyaad isaga ka amar qaata ay weerar bareer ah ku qaadeen xarumaha loogu adeego dadweynaha iyo xeryaha ciidamada qaranka,” ayaa lagu yiri warka.
Sida lagu sheegay bayaanka, weerarka ayaa lala beegsaday xarumo ay ka mid yihiin xafiiska Hay’adda Socdaalka iyo Jinsiyadaha, iyo xeryo ciidan oo ay deganaayeen ciidamada ammaanka ee dowladda Federaalka. Dowladda ayaa sheegtay in weerarku dhacay xilli dadweynuhu ay ku mashquulsanaayeen noloshooda maalinlaha ah, taasoo, sida ay sheegtay, muujinaysa “mas’uuliyad-darro” dhinaca Jubbaland.
Dowladda Federaalka ayaa sidoo kale u tacsiyaysay muwaadiniinta ku waxyeelloobay dagaalka, iyadoo ballan qaaday in cadaaladda la hor keeni doono cid kasta oo ku lug yeelata waxa ay ku tilmaantay “gabood-fallo abaabulan.”
“Dowladdu waxay digniin adag u direysaa maleeshiyaadka uu sida qaldan u adeegsado eedeysane Axmed Madoobe, waxaana la xusuusinayaa inay ogaadaan in qof kasta oo ka qaybqaata dambiyadaas sharciga la marsiin doono,” ayaa lagu xusay gabagabada warsaxaafadeedka.
Warkan ayaa imanaya iyadoo Jubbaland horey u sheegtay in ay la wareegtay gacan ku haynta magaalada Baladxaawo, kaddib dagaalka saaka dhacay, taas oo muujinaysa sii kordhaya khilaafka siyaasadeed iyo milatari ee u dhexeeya labada dhinac.