Wasaaradda Arrimaha Gudaha, Federaalka iyo Dimuqraadiyeynta Dowlad-goboleedka Puntland ayaa si rasmi ah u shaacisay dib-u-dhigidda fadhigii labaad ee Kalfadhiga 30-aad ee Golaha Deegaanka Degmada Gaalkacyo, sababo la xiriira xaaladda amni ee gobolka.
Go’aankan ayaa salka ku haya warqad rasmi ah oo kasoo baxday Xafiiska Guddoomiyaha Gobolka Mudug, kuna taariikheysneyd 20 Luuliyo 2025, isla markaana xambaarsaneyd tixgelin ku saabsan xaaladda ammaanka iyo talo la xiriirta in fadhiga la hakiyo. Warqaddaasi oo sumaddeedu ahayd MGM/XG/DPL/SOM/153/2025 ayaa lagu wargeliyay dhammaan hay’adaha khuseeya in fadhiga dib loo dhigay illaa waqti dambe oo la shaacin doono.
Wasaaradda ayaa sheegtay in go’aankaasi uu yahay mid lagu ilaalinayo danta guud, xasilloonida siyaasadeed, iyo nabadgelyada gobolka, iyadoo la tixgelinayo duruufaha taagan.
Xubno ka tirsan Golaha Deegaanka oo Ka Horyimid Go’aanka
Dhanka kale, 23 xildhibaan oo ka tirsan Golaha Deegaanka Gaalkacyo ayaa si cad uga horyimid go’aanka wasaaradda, iyagoo ku tilmaamay mid baal marsan dastuurka iyo xeerarka u yaalla Puntland. Xildhibaanadan oo horay mooshin uga gudbiyay Duqa Degmada Gaalkacyo, Maxamed Cabdirisaaq Daacad, ayaa sheegay in aysan aqbali doonin dib-u-dhigista fadhiga, ayna sii wadi doonaan howlaha Golaha si waafaqsan sharciga.
Khilaafkaan siyaasadeed ayaa kusoo beegmaya xilli magaalada Gaalkacyo ay wajahayso caqabado la xiriira ammaanka iyo kala aragti duwanaanta u dhexeysa maamulka gobolka iyo xubno ka tirsan golaha deegaanka.
Lama oga waqtiga rasmiga ah ee fadhiga dib loo qaban doono, balse Wasaaradda Arrimaha Gudaha ayaa sheegtay in go’aan rasmi ah laga gaari doono marka ay xaaladdu ogolaato.
