Golaha Wasiirrada Xukuumadda Federaalka Soomaaliya ayaa maanta yeeshay kulankoodii toddobaadlaha ahaa, iyadoo uu shir-guddoominayey Ra’iisul Wasaare Xamsa Cabdi Barre. Kulanka ayaa diiradda lagu saaray xaaladaha degdegga ah ee abaarta ka jirta gobolka Awdal, horumarka maamulka maaliyadda, iyo arrimo kale oo muhiim ah oo khuseeya dowlad-dhiska.
Gurmadka Abaarta Gobolka Awdal
Goluhu wuxuu warbixin ku saabsan saameynta abaarta ka dhageystay Wasaaradda Arrimaha Gudaha iyo Hay’adda Maareynta Musiibooyinka Qaranka (SODMA). Warbixinta ayaa tilmaantay in abaartu si ba’an u saameysay dadka, xoolaha iyo wax-soo-saarka deegaanada Saylac, Lughaya iyo tuulooyinka hoos yimaada.
Ra’iisul Wasaaraha ayaa faray hay’adaha dowladda ee ay quseyso in ay si degdeg ah uga jawaabaan xaaladda, lana gaarsiiyo gurmad bini’aadantinimo bulshooyinka ay abaartu halakeysay. Sidoo kale, goluhu wuxuu ugu baaqay shacabka Soomaaliyeed iyo hay’adaha caalamiga ah in ay gacan ka geystaan dadaallada lagu badbaadinayo dadka ku tabaalaysan abaarta.
Abaalmarin Qaran iyo Horumar Maaliyadeed
Golaha Wasiirrada ayaa hambalyo u diray Wasiirka Maaliyadda XFS, mudane Biixi Iimaan Cige, oo ku guuleystay abaalmarinta “Wasiirka Maaliyadda ugu Wanaagsan Qaaradda Afrika,” taas oo muujineysa guulaha la taaban karo ee laga gaaray dib-u-habeynta hannaanka maaliyadeed ee dalka.
Guulaha Warfaafinta Qaranka
Golaha ayaa sidoo kale bogaadiyay Wasaaradda Warfaafinta oo si rasmi ah u hirgalisay xarun warlalis casri ah (Media Satellite Teleport), taas oo sare u qaadday tayada iyo awoodda Warbaahinta Qaranka Soomaaliyeed, kana dhigaysa mid la jaanqaadaysa heerarka caalamiga ah.
Iskaashi Shaqo oo Soomaaliya iyo Turkiga ah
Ugu dambeyn, Golaha Wasiirrada ayaa ansixiyey heshiis is-afgarad ah oo ay soo gudbisay Wasaaradda Shaqada iyo Arrimaha Bulshada, kaas oo dhexmaray dowladaha Soomaaliya iyo Turkiga. Heshiiskan ayaa ku saabsan iskaashi dhanka shaqo-siinta, horumarinta xirfadaha shaqaalaha iyo dhiirrigelinta fursadaha shaqo ee dhalinyarada Soomaaliyeed.
