Hay’adda Sirdoonka iyo Ammaanka Qaranka Itoobiya (NISS) ayaa ku dhawaaqday inay xireen 82 qof oo lagu eedeeyay inay ka tirsan yihiin ururka argagixisada ah ee ISIS, kuwaasoo la sheegay inay qorsheynayeen weerarro gudaha dalka Itoobiya.
Bayaan ay NISS soo saartay ayaa lagu sheegay in dadka la qabtay ay xiriir la leeyihiin faraca ISIS ee ka howl-gala gudaha Soomaaliya, gaar ahaan kuwa saldhigyada ku leh Puntland.
“Kooxdan waxay tababarro ciidan iyo fikradeed ku soo qaateen deegaanada Puntland ee Soomaaliya, ka hor inta aan loo kala dirin gobollo kala duwan oo Itoobiya ka tirsan,” ayaa lagu yiri warka ay faafisay hay’addu.
Gobollada la tilmaamay in xubnahan lagu qabtay waxaa kamid ah Addis Ababa, Amxaarada, iyo Oromada, kuwaas oo dhammaantood la sheegay in la doonayay in laga fuliyo weerarro argagixiso.
Hay’addu waxay sidoo kale sheegtay in qaar ka mid ah xubnahan ay xiriir toos ah la leeyihiin ISIS Caalami ah, isla markaana ay heleen taageero dhaqaale iyo mid farsamo.
“Waxaa jiray qorshe ballaaran oo ay kooxdaasi doonaysay in Itoobiya ay saldhig uga dhigato howlgallo isku xiran oo argagixiso ah, kuwaas oo lagu waxyeelayn lahaa amniga gudaha,” ayaa lagu daray bayaanka.
Mas’uuliyiinta Itoobiya waxay sheegeen in baaritaannada ay socdeen muddo dheer, islamarkaana kooxda si dhow loola socday ilaa la gaaray xilligii ku habboonaa ee lagu qaban lahaa.
NISS waxay ku boorisay shacabka in ay la shaqeeyaan laamaha ammaanka si looga hortago wax kasta oo khatar gelin kara amniga qaranka.