Wararka laga helayo magaalada Dhahar ee gobolka Sanaag ayaa sheegaya in halkaasi uu ka qarxay dagaal culus oo u dhexeeya ciidamo ka amar qaata Maamulka Puntland iyo ciidamo deegaanka ah oo ka tirsan Beesha Maakhir, kuwaasoo si buuxda u taageersan dhismaha maamulka Maakhir iyo shirweynaha ka socda magaalada Laascaanood ee lagu dhisayo maamulka SSC-Khaatumo.
Rasaasta ayaa si xooggan uga bilaabatay Xaafadda Sare ee magaalada Dhahar, oo ah halka laga soo galo magaalada, halkaasoo ay ku sugan yihiin fariisimo ay leeyihiin ciidamada deegaanka ee taageersan Maakhir. Dagaalka ayaa u muuqda mid salka ku haya khilaaf siyaasadeed oo ka dhashay mowqifyada iska soo horjeeda ee la xiriira arrinta ku biirista magaalada Dhahar ee nidaamka SSC-Khaatumo.
Ilo deegaanka ah ayaa sheegay in dagaalku si lama filaan ah u qarxay, iyadoo weli aan la helin faahfaahin rasmi ah oo ku saabsan khasaaraha ka dhashay, hase yeeshee wararka hordhaca ah ayaa muujinaya cabsi xooggan oo laga qabo in xaaladdu faraha ka baxdo haddii aan si degdeg ah loo joojin colaadda.
Dagaalkan ayaa kusoo beegmaya iyadoo magaalada Laascaanood uu ka socdo Shirweynaha dhismaha maamulka SSC-Khaatumo, shir si weyn u saameynaya isku dheellitirnaanta siyaasadeed ee gobollada waqooyi bari Soomaaliya.
