Ciidanka Booliiska Soomaaliyeed, gaar ahaan qeybta Gobolka Banaadir, ayaa gacanta kusoo dhigay askari ka tirsan Ciidanka Xoogga Dalka oo loo haysto eedeyn culus oo ah jirdil arxan darro ah oo uu u geystay gabar Soomaaliyeed. Askariga oo lagu magacaabo Axmed Nuur Maxamuud ayaa la sheegay inuu ka tirsanaa ilaalada Madaxtooyada Qaranka.
Falkaan foosha xun ayaa soo ifbaxay kaddib markii muuqaal laga duubay askariga oo si naxariis darro ah u garaacaya gabadha lagu baahiyay baraha bulshada, taasoo dhalisay caro xooggan iyo falcelin aad u ballaaran oo ka timid bulshada Soomaaliyeed.
Booliiska gobolka Banaadir ayaa si deg deg ah uga falceliyay dhacdada, iyagoo xabsiga dhigay askariga eedeysan. Taliska Booliiska Soomaaliyeed ayaa war rasmi ah ku sheegay in askariga hadda lagu hayo xabsi ku-meel-gaar ah oo baaritaan lagu wado, isla markaana si dhakhso ah loo horgeyn doono maxkamad si uu u wajaho cadaaladda.
Sidoo kale, Taliska Booliisku wuxuu farriin adag u diray dhammaan ciidamada qalabka sida ee dalka, isagoo ku adkeeyay in aan marnaba la aqbali doonin xadgudub ka dhan ah xuquuqda muwaadiniinta. Waxaa la xusuusiyay ciidamada in mas’uuliyad, akhlaaq iyo dhowrsanaan laga rabo qof walba oo huwan darajada ciidan.
Booliisku waxa uu mar kale xaqiijiyay in shacabka Soomaaliyeed ay mudan yihiin in si sharaf leh loola dhaqmo, ayna ciidamada amniga u joogaan ilaalinta xuquuqdooda, badbaadadooda iyo karaamadooda.
