Ciidamada ammaanka magaalada Gaalkacyo ee dhanka Galmudug ayaa xalay fuliyay howlgal ballaaran oo lagu xoojinayo amniga magaalada. Howlgalkan ayaa waxaa hoggaaminayay Ku-simaha Duqa Degmada Gaalkacyo ahna Guddoomiye Ku-xigeenka degmada, Eng. Maxamed Cabdi Cilmi, iyadoo ay wehelinayeen saraakiil sare oo ka tirsan laamaha amniga.
Howlgalka oo ka dhacay xaafado kala duwan iyo wadooyinka muhiimka u ah isu socodka shacabka, ayaa lagu bartilmaameedsaday kooxaha ku lugta leh dhaca moobillada iyo falalka keena qalqal gelinta amniga.
Guddoomiye ku-xigeenka degmada, Eng. Maxamed Cabdi Cilmi, ayaa sheegay in maamulka degmada iyo hay’adaha amniga ay hayaan xog sugan oo la xiriirta kooxaha falalka amni-darro ka wada magaalada. Wuxuu caddeeyay in aan loo dulqaadan doonin cid kasta oo lagu helo dembiyadaas.
“Cid kasta oo lagu helo inay ku lug leedahay amni-darro tallaabo sharci ah ayaa laga qaadi doonaa. Waxaa naga go’an sugidda nabadda iyo xasilloonida Gaalkacyo,” ayuu yiri Eng. Maxamed.
Tallaabadan ayaa qeyb ka ah dadaallada joogtada ah ee maamulka Galmudug iyo degmada Gaalkacyo ay ku doonayaan in lagu adkeeyo amniga, loogana hortago falalka khatarta ku ah nolosha shacabka.
