Wasiirka Wasaaradda Isgaarsiinta iyo Tiknolojiyadda ee Jamhuuriyadda Federaalka Soomaaliya, Xildhibaan Maxamed Aadan Macallin (Soomaali), ayaa ka qeybgalay Shirweynaha Heerka Sare ee WSIS+20, oo ka socda magaalada Geneva ee dalka Switzerland.
Shirkan caalamiga ah oo si wadajir ah ay u martigelinayaan Hay’adda Isgaarsiinta Caalamiga ah (ITU) iyo Dowladda Switzerland, ayaa lagu falanqeeyay horumarka laga gaaray isbeddelka dhijitaalka ah tan iyo markii la bilaabay hindisaha WSIS, iyadoo sidoo kale lagu dejinayo jihada cusub ee horumarinta tiknolojiyadda iyo dijitaalka.
Intii uu shirku socday, Wasiir Maxamed Aadan waxa uu kulammo miro-dhal ah la yeeshay:
-
Dr. Cosmas Zavazava, Agaasimaha Guud ee Waaxda Horumarinta Isgaarsiinta ee ITU (BDT),
-
Wasiirrada Isgaarsiinta ee Malaysia iyo Jabuuti.
- Advertisement -
Kulammadan ayaa diiradda lagu saaray:
-
Kobcinta xirfadaha dhijitaalka ah ee dhallinyarada,
-
Amaan-gelinta internetka,
-
Iyo horumarinta maamulka dowladnimada dhijitaalka ah.
Wasiir Maxamed Aadan ayaa caddeeyay sida ay Dowladda Federaalka Soomaaliya uga go’an tahay in ay sii xoojiso wadashaqeynta ay la leedahay ITU iyo daneeyeyaasha kale ee caalamiga ah, si loo xaqiijiyo isbeddel dijitaal ah oo waara, loo dhan yahay, una adeegaya horumarka Soomaaliya.
Wafdiga uu hoggaaminayay Wasiirka waxaa ka mid ahaa:
-
Maareeyaha Hay’adda Isgaarsiinta Qaranka (HIQ),
-
Iyo Safiirka Soomaaliya u fadhiya dalalka Switzerland iyo Austria, Amb. Khadra Axmed Ducaale.
