Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, iyo wafdi uu hoggaaminayo ayaa maanta lagu wadaa inay kulan rasmi ah la yeeshaan Madaxweynaha Jamhuuriyadda Carabta ee Masar, Mudane Cabdulfataax Al-Sisi, iyadoo kulankaasi ka dhici doono magaalada Qaahira ee caasimadda dalkaasi.
Kulanka labada Madaxweyne ayaa diiradda lagu saari doonaa xoojinta xiriirka laba geesoodka ah ee ka dhexeeya Soomaaliya iyo Masar, gaar ahaan dhinacyada amniga, dhaqaalaha, waxbarashada iyo iskaashiga siyaasadeed ee gobolka.
Sidoo kale, labada hoggaamiye ayaa ka wada hadli doona arrimaha gobolka, iyadoo si gaar ah diiradda loo saari doono xiisadda la xiriirta webiga Nile iyo saamaynta ay ku yeelan karto wadamada gobolka, oo ay ka mid tahay Soomaaliya.
Kulanka ayaa sidoo kale lagu falanqeyn doonaa arrimaha la xiriira iskaashiga milatari iyo doorka ciidamada Masar ee xoojinta nabadda iyo ammaanka gobolka.
Madaxweyne Xasan Sheekh Maxamuud ayaa uga mahadceliyey Dowladda Masar soo dhaweynta diirran iyo martigelinta heer qaran ee loo sameeyey wafdigiisa, isagoo tilmaamay in ay ka tarjumeyso xiriirka taariikhiga ah iyo walaaltinimada ka dhaxaysa labada shacab ee Soomaaliya iyo Masar.