Dowladda Rwanda iyo Jamhuuriyadda Dimuqraadiga ee Congo ayaa magaalada Washington ee caasimadda Maraykanka ku kala saxiixday heshiis nabadeed oo lagu soo afjarayo colaaddii tobannaan sano ka taagneyd Bariga Kongo, taas oo horseeday dhibaatooyin bani’aadanimo iyo burbur dhaqaale oo baahsan.
Heshiiskan ayaa diiradda saaraya qodobo muhiim ah oo ay kamid yihiin kala saarista kooxaha hubeysan, barnaamijyo hub-ka-dhigista ah, iyo in la sameeyo hannaan isdhexgal oo nabadeed oo ku wajahan kooxaha hubaysan ee ka dagaalama gobolka. Inkasta oo faahfaahinta heshiiska aan si buuxda loo shaacin, haddana wuxuu astaan u yahay rajo cusub oo la gelinayo nabadda gobolka.
Madaxweynaha Maraykanka Donald Trump ayaa ku tilmaamay heshiiska “guul taariikhi ah” oo u dhaxaysa labada dal ee deriska ah, isagoo yiri:
“Maanta, rabshadaha iyo burburku waa dhammaad. Gobolka wuxuu billaabay bog cusub oo rajo iyo fursad ah.”
Heshiiska waxaa saxiixay Wasiirrada Arrimaha Dibadda ee labada dal, iyadoo munaasabadda lagu qabtay xarunta Wasaaradda Arrimaha Dibadda ee Maraykanka.
Diblumaasiyiin ku sugan Washington ayaa tilmaamay in heshiiskani uu qeyb ka yahay dadaallo is-daba joog ah oo lagu doonayo xasilinta gobolka, iyadoo horey heshiisyo nabadeed oo badan uga fashilmeen Bariga Afrika.
Madaxweyne Félix Tshisekedi ayaa lagu ammaanay kaalinta uu ka qaatay heshiiskan, waxaana loo arkaa inuu gaaray “guushii diblumaasiyadeed ee ugu weynayd muddo soddon sano ka badan.”
Waxaa sidoo kale jira warar sheegaya in Madaxweyne Tshisekedi iyo dhiggiisa Rwanda, Paul Kagame, ay qorsheynayaan safar rasmi ah oo ay ku tegi doonaan Washington si ay ula kulmaan Madaxweyne Trump, inkasta oo aan weli si rasmi ah loo shaacin taariikhda rasmiga ah.
Dhinaca kale, dalka Qadar ayaa lagu bogaadiyay doorkiisii xoojinta dadaallada diblumaasiyadeed, gaar ahaan tan iyo markii xiisadda labada dal ay cirka isku shareertay horraantii sanadkan.