Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta ubax dhigay Taallada Dhagax-Tuur ee magaalada Muqdisho, isagoo xusaya halgankii geesiyaasha Soomaaliyeed ee naftooda u huray xorriyadda Gobollada Waqooyi iyo guud ahaan gobannimada dalka.
Madaxweynaha ayaa ku tilmaamay Taallada Dhagax-Tuur astaan qaran oo xambaarsan xusuusta halgankii lagu gaadhay madax-bannaanida Soomaaliya, taasoo astaan u ah dhiirigelinta jiilasha maanta iyo kuwa mustaqbalka.
“Dhagax-Tuur waa xusuus qaran oo na xasuusinaysa geesinimada, dulqaadka iyo isku duubnida halgamayaashii Soomaaliyeed. Waa waajib in aan adkeyno midnimada, dal jacaylka iyo wadajirka, si aan u xaqiijino himmilooyinkii awoowayaasheen ee Soomaaliya xor ah, nabad ah oo horumarsan,” ayuu yiri Madaxweyne Xasan Sheekh.
Munaasabadda ayaa waxaa ka qeyb galay xubno ka tirsan Golaha Wasiirrada, Guddoomiyaha Gobolka Banaadir ahna Duqa Muqdisho, Xildhibaanno, masuuliyiin ka tirsan Dowladda, iyo qaybaha kala duwan ee bulshada caasimadda.
Ubax-dhigga sanadkan ayaa qayb ka ah xuska 65-guuradii kasoo wareegtay xornimada Gobollada Waqooyi ee dalka, oo ku beegan 26-ka Juun 1960-kii.
