Madaxweynaha Jubbaland Axmed Maxamed Islaam (Axmed Madoobe) ayaa gaaray magaalada Garoowe ee xarunta gobolka Nugaal, halkaas oo uu kulan siyaasadeed kula yeelanayo madaxweynaha Puntland Saciid Cabdullaahi Deni.
Kulanka labada hoggaamiye oo ka dhacaya maanta Garoowe, ayaa diiradda lagu saari doonaa xaaladda siyaasadeed ee dalka, gaar ahaan muranka ka taagan wax ka beddelka dastuurka KMG ah ee ay sameysay madaxtooyada Soomaaliya iyo arrimaha doorashooyinka la filayo inay dalka ka dhacaan sannadka 2026.
Warar xog ogaal ah ayaa tilmaamaya in labada dhinac ay isku dayayaan in ay kasoo saaraan mowqif mideysan oo ay uga jawaabayaan isbeddelka dastuurka iyo khilaafka siyaasadeed ee dowladda federaalka iyo maamul goboleedyada qaarkood.
Sidoo kale, waxaa la filayaa in kulankan uu horseedo casuumaad rasmi ah oo loo fidinayo mucaaridka ku sugan Muqdisho, si shir siyaasadeed oo ballaaran loogu qabto Garoowe, kaas oo lagu falanqeyn doono jihada cusub ee siyaasadda Soomaaliya, iyada oo la wajahayo doorashada madaxtinimada ee 2026.
Kulankan ayaa ah kii ugu horreeyay ee rasmiga ah oo ay Axmed Madoobe iyo Saciid Deni yeeshaan tan iyo doorashadii guud ee dalka ka dhacday sannadkii 2022. Labada hoggaamiye ayaa dhawaan kulmay magaalada Abu Dhabi, halkaas oo ay kaga heshiiyeen mad-madow siyaasadeed oo saameeyay xiriirkooda kadib doorashadaasi.
Wixii kasoo kordha kulankan siyaasadeed, dib ayaan ka soo sheegi doonaa.