Waxaa lagu wadaa in toddobaadkan magaalada Muqdisho uu ka furmo shir albaabadu u xiran yihiin, kaas oo uu guddoomin doono Madaxweynaha Jamhuuriyadda Federaalka Soomaaliya, Xasan Sheekh Maxamuud, isla markaana ay ka qeybgeli doonaan madaxdii hore ee dalka ee kasoo horjeeda habka ay dowladda u wajaheyso doorashooyinka dalka.
Shirka ayaa noqon doona mid aan loo ogolaan warbaahinta, iyadoo la filayo in dhinacyadu si hoose uga wadahadlaan aragtiyaha kala duwan ee ka taagan hannaanka doorashooyinka iyo xaaladda siyaasadeed ee dalka.
Kulammo Hordhac Ah oo Dhexmaray Mucaaradka
Dhanka kale, xubnaha Madasha Samata-bixinta Mucaaradka Soomaaliyeed ayaa xalay kulan ku yeeshay hoyga uu Muqdisho ka dagan yahay Madaxweynihii hore Shariif Sheekh Axmed. Kulankaas ayaa lagu sheegay mid hordhac u ah is-afgarad la filayo, waxaana xubnaha madasha ay mabda’ ahaan ku heshiiyeen in ay oggol yihiin kulan rasmi ah oo ay la yeeshaan Madaxweynaha, kaddib casuumaad uga timid Villa Somalia.
Wararka ayaa sheegaya in xubnuhu ay isla qaateen in shir gaar ah oo dhexdooda ah la qabto, si loo go’aamiyo waqtiga ku habboon ee kulanka rasmiga ah iyo xubnaha meteli doona Madasha.
Mas’uuliyiin Kale oo Kusoo Wajahan Muqdisho
Waxaa sidoo kale maanta la filayaa in magaalada Muqdisho uu soo gaaro Ra’iisul Wasaarihii hore ee Soomaaliya, Cumar Cabdirashiid Cali Sharmaarke, oo haatan ku sugan magaalada Nairobi. Sidoo kale, Ra’iisul Wasaarihii hore Cabdi Faarax Shirdoon (Saacid) ayaa isaguna lagu wadaa inuu dalka soo gaaro.
Inta badan xubnaha Madasha mucaaradka ayaa dib ugu soo laabtay Muqdisho, kaddib safarro ay ku maqnaayeen dibadda, taasoo sare u qaaday rajada laga qabo in wada-hadallo miro dhal ah ay ka bilowdaan caasimadda.
