Wasaaradda Kalluumeysiga iyo Dhaqaalaha Buluuga ah ee Jamhuuriyadda Federaalka Soomaaliya (JFS) iyo Shirkadda OYAK ee dalka Turkiga ayaa maanta kala saxiixday heshiis muhiim ah oo lagu horumarinayo kalluumeysiga Soomaaliya, iyada oo la doonayo in la xoojiyo ka faa’iideysiga kheyraadka badda dalka.
Heshiiskan oo lagu tilmaamay mid istaraatiiji ah, ayaa diiradda saaraya dhowr qodob oo muhiim ah kuwaasoo isugu jira horumarinta dhaqaalaha, shaqo-abuurka, iyo ilaalinta kheyraadka dabiiciga ah. Qodobada ugu muhiimsan ee heshiiska ka mid ah waxaa ka mid ah:
-
Maalgashi toos ah oo lagu sameynayo kaabeyaasha kalluumeysiga, sida dekedaha yar yar, xarumaha qaboojinta iyo qalabka kalluumeysatada.
-
Kor u qaadista wax-soo-saarka kalluunka si loo daboolo baahida gudaha iyo tan dibadda.
-
Tayeynta kalluunka si uu u gaaro suuqyada caalamiga ah iyadoo la raacayo heerarka tayada iyo badbaadada cuntada.
- Advertisement - -
Dhisidda warshado casri ah oo lagu farsameeyo kalluunka, taasoo kor u qaadaysa dhoofinta iyo shaqo-abuurka dhalinyarada Soomaaliyeed.
-
Hagaajinta nidaamka la dagaallanka kalluumeysiga sharci darrada ah, iyadoo loo marayo kormeer, sharci-dejin iyo wada-shaqeyn caalami ah.
Heshiiska waxaa dhanka dowladda Federaalka Soomaaliya u saxiixay Wasiirka Wasaaradda Kalluumeysiga iyo Dhaqaalaha Buluuga ah, Mudane Axmed Xasan Aadan, halka dhanka Shirkadda OYAK uu u saxiixay Mudane Sermaye Yatırımları Anonim Şirketi oo ka socday maamulka sare ee shirkadda.
Wasiir Axmed Xasan Aadan ayaa sheegay in heshiiskani uu noqon doono tallaabo weyn oo lagu kobcinayo dhaqaalaha badda ee dalka, isla markaana uu horseedi doono fursado shaqo oo baaxad leh, gaar ahaan dhalinyarada Soomaaliyeed.
Heshiiskan ayaa la filayaa inuu noqdo bilow cusub oo lagu kobcinayo dhaqaalaha badda, loogana hortagayo kalluumeysiga sharci darrada ah, taasoo muddo dheer caqabad ku ahayd horumarka kalluumeysiga Soomaaliya.