Xoghayaha Arrimaha Dibadda ee Mareykanka, Marco Rubio, ayaa si adag u cambaareeyay go’aanka ay dalalka Britain, Australia, Canada, New Zealand iyo Norway si wadajir ah cunaqabatayn ugu soo rogeen laba wasiir oo xagjir ah oo ka tirsan dowladda Israa’iil.
Rubio ayaa sheegay in tallaabadan aysan wax ka taraynin dadaallada xabad-joojin ee uu Mareykanku ka wado Gaza, isagoo ku tilmaamay mid dhaawacaysa dadaallada diblomaasiyadeed ee socda.
Dalalkan ayaa si cad ugu eedeeyay wasiirrada Itamar Ben-Gvir iyo Bezalel Smotrich inay hurinayaan rabshado joogto ah oo ka dhan ah Falastiiniyiinta ku nool Daanta Galbeed ee la haysto. Go’aankan ayaa horseeday in laga mamnuuco gelista UK, isla markaana la xayiro hantidooda ku taal gudaha dalkaas.
Cunaqabatayntan ayaa qeyb ka ah dadaal wadajir ah oo Talaadadii ay ku dhawaaqeen shanta dowladood, iyagoo muujinaya mowqif adag oo ay ka qaateen siyaasiyiinta xagjirka ah ee ku lugta leh rabshadaha iyo xiisadaha gobolka.