Wararka laga helayo deegaanka Ceel Hareeri ee gobolka Hiiraan ayaa sheegaya in dagaal culus uu weli ka socdo halkaasi, kaasoo u dhaxeeya ciidamada deegaanka ee loo yaqaan Macawiisleyda iyo kooxaha Al-Shabaab.
Dagaalka ayaa billowday kadib markii ciidamada Macawiisleyda ay weerar ku qaadeen maleeshiyaad katirsan Al-Shabaab oo la sheegay inay isku uruursanayeen duleedka deegaanka. Goob-joogayaal ayaa sheegay in dagaalka uu yahay mid culus oo ay labada dhinacba adeegsanayaan hub waaweyn, iyadoo rasaasta laga maqlayo tuulooyin ka fog goobta ay colaadu ka socoto.
Wararka hordhaca ah ayaa tilmaamaya inuu jiro khasaare dhimasho iyo dhaawac isugu jira, hase yeeshee lama xaqiijin karo tirada rasmiga ah maadaama dagaalku wali socdo, waxaana xaaladdu tahay mid kacsan.
Isku dhacyadan ayaa kusoo beegmaya iyadoo maanta guud ahaan dalka laga ciidayo munaasabadda Ciidul Adxaa, balse dadka ku nool Ceel Hareeri ayaa ku waabariistay rasaas halkii ay ka heli lahaayeen farxad ciideed, iyadoo ciidamada deegaanka ay doonayaan inay Al-Shabaab ka xoreeyaan deegaankaasi.
Gobolka Hiiraan ayaa hadda ah halkii ugu weynayd ee dagaal toos ah uu ka socdo, iyadoo ciidamada deegaanka ee Macawiisleyda ay hoggaaminayaan howlgallada lagula dagaallamayo Al-Shabaab. Ilo-wareedyo ayaa sheegay in aysan jirin taageero muuqata oo ka timid dowladda federaalka ama beelaha kale ee deriska la ah, taasoo muujinaysa halgan adag oo ay wadaan dadka deegaanka si ay u helaan nabad iyo xasillooni.