Hoggaamiyeyaasha mucaaradka ee ku bahoobay Madasha Samatabixinta Soomaaliya ayaa maanta kulan muhiim ah la yeeshay wakiillada beesha caalamka ee ku sugan magaalada Muqdisho, iyagoo xoogga saaray arrimaha doorashooyinka iyo mustaqbalka siyaasadeed ee dalka.
Kulankan, oo daba socda shirkii dhawaan Madashu ku qabatay Muqdisho, ayaa diiradda lagu saaray baahida loo qabo in la helo hannaan doorasho oo ay Soomaalidu u dhanyahay, waafaqsan dastuurka iyo heshiisyadii hore, isla markaana ku dhacda waqtigeeda.
Intii uu socday kulanka, waxaa si qoto dheer looga wadahadlay muhiimadda ay leedahay in la helo jawi siyaasadeed oo deggan, lana dhiso kalsoonida shacabka, hay’adaha dowladda, iyo saaxiibada caalamiga ah ee garab taagan Soomaaliya.
Hoggaamiyeyaasha Madasha ayaa la wadaagay wakiillada beesha caalamka talooyin iyo aragtiyo ku aaddan dardargelinta dib-u-heshiisiinta siyaasadeed iyo dhismaha nidaam doorasho oo ku saleysan wadatashi, hufnaan, iyo xorriyad.
Dhankooda, wakiillada beesha caalamka ayaa muujiyay taageeradooda ku aaddan horumarinta dimuqraadiyadda Soomaaliya, waxayna si gaar ah u bogaadiyeen doorka Madasha ee ku wajahan dhiirrigelinta wadahadalka iyo kor u qaadidda wacyiga bulshada.
Mucaaradka Soomaaliya ayaa mar kale adkeeyay in xalka siyaasadeed ee dalka uu ku xiran yahay helidda nidaam doorasho oo lagu wada qanacsan yahay, si dalka si nabad ah uga gudbo marxaladda kala-guurka loogana gudbo caqabadaha siyaasadeed ee taagan.