Agaasimihii hore ee Hay’adda Nabadsugidda iyo Sirdoonka Qaranka (NISA), Mudane Fahad Yaasiin Xaaji Daahir, ayaa qoraal kooban oo uu ku faafiyay bartiisa X (Twitter) ku muujiyay sagootin iyo mahadcelin uu u diray Taliyihii hore ee NISA, Cabdullaahi Maxamed Cali (Sanbaloolshe), iyo hambalyo uu u jeediyay Taliyaha cusub, Mahad Maxamed Salaad.
Fahad Yaasiin ayaa sheegay in uu dhowr jeer si gaar ah ula xiriiray Taliye Sanbaloolshe muddadii uu xilka hayay, isagoo uga mahadceliyay wada-shaqayntii wanaagsaneyd, xushmadda iyo qadarinta uu kala kulmay intii uu xilka hayay.
Dhanka kale, waxa uu si diirran u soo dhaweeyay magacaabista Mahad Maxamed Salaad oo mar kale loo igmaday hoggaanka Hay’adda NISA. Fahad Yaasiin ayaa u rajeeyay Taliyaha cusub guul iyo waajibaad gudasho hufan, isaga oo hoosta ka xarriiqay muhiimadda ay leedahay in la sii xoojiyo amniga qaranka.
Qoraalka Fahad Yaasiin ayaa tilmaamaya isbeddelka hogaamineed ee Hay’adda NISA iyo sida uu ugu rajo weyn yahay in mas’uuliyiinta cusub ay la yimaadaan hoggaan tayo leh oo sare u qaada amniga iyo xasiloonida dalka.