Magaalada Baqdaad ee dalka Ciraaq ayaa maanta martigelineysa meertada 34-aad ee shirka Jaamacadda Carabta, iyadoo la filayo in diiradda lagu saaro arrimaha Falastiin, gaar ahaan xaalada Qaza. Madaxweynaha Soomaaliya, Xasan Sheekh Maxamuud, ayaa ka mid ah madaxda ka qeyb galeysa shirka.
Soomaaliya waxa ay kulanka ku mataleysa mowqif cad oo la xiriira la-dagaalanka argagaxisada, iyadoo Madaxweyne Xasan Sheekh lagu wado inuu si gaar ah uga hadlo dagaalka ka dhanka ah Al-Shabaab iyo Daacish. Inta uu joogo Baqdaad, madaxweynuhu wuxuu la kulmi doonaa qaar ka mid ah madaxda Carabta si loo xoojiyo xiriirka diblomaasiyadeed.
Shirka oo ah mid heer sare ah ayaa sidoo kale looga hadlayaa dadaallada xabbad-joojinta Qaza, dhismaha dowlad madax-bannaan oo Falastiini ah, iyo diyaarinta shir dib-u-dhis ah oo lagu qaban doono magaalada New York bisha Juun.
Waxaa la xaqiijiyay in shirka ay goobjoog ka yihiin shan hoggaamiye oo Carbeed, oo ay ku jiraan Madaxweynaha Falastiin Maxamuud Cabaas, Madaxweynaha Masar Cabdifataax Al-Sisi, iyo Amiirka Qatar, Tamim bin Hamad. Xoghayaha Guud ee Qaramada Midoobay António Guterres ayaa isna ka mid ah ka qayb-galayaasha shirka.