Muqdisho, Soomaaliya – 17 May 2025 – Hay’adda Isgaarsiinta Qaranka (HIQ) ayaa magaalada Muqdisho ku qabatay munaasabad wacyigelin iyo tababar farsamo isugu jirta oo lagu xusay Maalinta Aqbalaadda Caalamiga ah (Universal Acceptance Day), taas oo diiradda saareysa aqbalidda magacyada domain-ka, ciwaanada iimaylka ee caalamiga ah (EAI), iyo hababka barnaamijyada aan ku salaysnayn farta Laatiinka, iyadoo sanadkan hal-ku-dhigga ahaa “Kobcinta Ka-qaybgalka Dhijitaalka ee loo dhan yahay.”
Munaasabaddan ayaa waxaa isugu yimid mas’uuliyiin iyo xirfadlayaal ka tirsan dowladda, hay’adaha horumarinta, bahda waxbarashada, shirkadaha isgaarsiinta, bixiyeyaasha adeegyada internet-ka, shirkadaha teknoolojiyadda, iyo urrada bulshada si ay uga wadahadlaan sida Aqbalaadda Caalamiga ah uga qayb qaadan karto dhismaha internet furan oo ay dhammaan bulshada Soomaaliyeed ka faa’iideysan karaan.
Maareeye Ku-xigeenka ee Hay’adda Isgaarsiinta Qaranka, Mudane Axmed Cali Salaad, oo munaasabadda furay, ayaa xusay muhiimadda ay leedahay Aqbalaadda Caalamiga ah, gaar ahaan doorka ay ku leedahay hannaanka isbeddelka dhijitaalka ah ee dalkeenna iyo sidii loo heli lahaa adeegyo internet ah oo loo siman yahay. Isagoo yiri:
“Aqbalaadda Caalamiga ah waxay xaqiijineysaa in dhammaan magacyada domain-ka iyo ciwaanada iimaylka—iyadoon loo eegin far-qoraalka, luqadda ama dhererka—ay si caalami ah uga shaqeeyaan dhammaan nidaamyada internet-ka. Taasi waxay naga caawinaysaa in aan dhisno jawi dhijitaal ah oo loo siman yahay, laguna kalsoonaan karo.”
Munaasabaddan oo ay soo qabanqaabisay Waaxda Maamulka Furaha Internet-ka Qaranka ee hoos timaada Hay’adda, ayna taageeraysay Hay’adda Maamulka Magacyada iyo Lambarada Internet-ka (ICANN), ayaa ujeeddadeedu ahayd kor u qaadista wacyiga ku saabsan Aqbalaadda Caalamiga ah iyo xoojinta diyaar garowga farsamo ee ee lagama maarmaanka u ah ka hirgelinta dalkeenna.
Mabda’a Aqbalaadda Caalamiga ah ayaa ah in dhammaan magacyada domain-ka iyo ciwaanada iimaylka—iyadoon loo eegin luqad, far-qoraal ama dherer—si caalami ah looga aqbalo nidaamyada internet-ka ee kala duwan.
Munaasabadda ayaa ka koobnayd soo bandhigyo farsamo iyo tababarro toos ah, iyadoo diiradda lagu saaray mowduucyo ay kamid yihiin Magacyada Domain-ka ee Caalamiga ah (IDNs), Ciwaanada Iimaylka ee Caalamiga ah (EAI), iyo hababka barnaamijyada lagu diyaariyo si loo dhiso mareego iyo barnaamijyo (websites and applications) u hoggaansan heerarka Aqbalaadda Caalamiga ah.
