Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa si cad u sheegay in dalka Soomaaliya aan dib loogu celin doonin habka doorashooyinka dadban, isaga oo xusay in dalka lagu hagi doono hanaan dimuqraadi ah oo qof iyo cod ah.
Madaxweynuhu wuxuu hadalkan ka jeediyay munaasabadda daahfurka urur siyaasadeed cusub oo ay sameeyeen hoggaamiyayaal ka tirsan dowladda federaalka iyo qaar ka mid ah madaxda dowlad-goboleedyada. Madaxweynaha ayaa tilmaamay in cid gaar ah ama koox leh ajende gaar ah aysan dalka u hor istaagi karin horumarka siyaasadeed, isagoo xusay in fikirka siyaasadeed ee mideysan uu yahay waxa keliya ee dadka iyo dalka isku haya.
“Koox ajande gaar ah leh dadka iyo qabiil iskuma hayn karaan, dalka waxaa isku hayn kara fikir siyaasi ah oo mustaqbal fiican laga dhex arko,” ayuu yiri Madaxweyne Xasan Sheekh.
Isagoo sii hadlayay ayuu yiri: “Isbedelkasta waa xanuun iyo cabsi badan yahay, dibna uma noqon karno, meeshaan 25 sano joognayna masii ahaan karno, horay u soconaynaa, masii taagnaan karno.”
Inkasta oo Madaxweynaha caddeeyay mowqifka dowladda federaalka, haddana weli ma cadda sida ay uga falcelin doonaan madaxda dowlad-goboleedyada Puntland iyo Jubbaland, iyo sidoo kale siyaasiyiinta mucaaradka ee dhaliilsan hab-dhaqanka dowladda.
