Jabuuti – 30 Abriil 2025 – Xaflad si heer sare ah loo agaasimay ayaa maanta ka dhacday magaalada Jabuuti, taas oo loogu dabaaldegayay qalinjabinta dufcaddii 22aad ee ciidanka Booliska Soomaaliyeed oo halkaas ku dhammeystay tababar gaar ah. Munaasabaddan ayaa muujisay sare u kaca iskaashiga amni ee gobolka iyo taageerada caalamiga ah ee lagu garab taagan yahay hay’adaha ammaanka Soomaaliya.
Munaasabadda waxaa ka soo qeybgalay mas’uuliyiin sar sare oo ka kala socday dalalka Soomaaliya, Jabuuti iyo Taliyaaniga, kuwaas oo caddeeyay muhiimadda ay leedahay wada-shaqeynta gobolka iyo beesha caalamka si loo xoojiyo nabadda iyo xasilloonida Geeska Afrika.
Taliyaha Guud ee Booliska Jabuuti, General Cabdourahman Cali Kaahin, ayaa si diirran u soo dhaweeyay Wasiirka Arrimaha Gudaha Jabuuti, Saïd Nouh Hassan, saraakiil sare oo ka tirsan booliska Jabuuti iyo wakiillo ka socday ciidamada Taliyaaniga ee ku sugan dalkaas.
Taliyaha ku xigeenka booliska Soomaaliya, Jeneraal Cusmaan Cabdullaahi Maxamed, oo ka hadlay madasha, ayaa si qoto dheer ugu mahadceliyay dowladda Jabuuti iyo Taliyaaniga taageerada joogtada ah ee ay la garab taagan yihiin dhismaha iyo tayeynta booliska Soomaaliyeed.
“Maanta waa maalin sharaf iyo farxad leh. Waxaan hambalyo u dirayaa dhammaan saraakiisha cusub ee ka tirsan dufcaddii 22aad, kuwaas oo si rasmi ah u dhammeystay tababarkooda, isla markaana hadda si buuxda ugu biiray Booliska Soomaaliyeed,” ayuu yiri Taliye Cusmaan.
Dufcaddan 22aad oo ah qaybta Darawiishta ee Booliska Soomaaliyeed ayaa helay tababar gaar ah oo diiradda lagu saaray xirfadaha amniga, anshaxa iyo maaraynta xaaladaha degdega ah. Tababarkan ayaa qayb ka ah dadaallada lagu tayeynayo awoodda gudaha ee Soomaaliya si ay u hanato amnigeeda.
Wakiillada ka socday howlgalka talyaaniga ee “MINITI”, oo kormeerayay tababarkan, ayaa sidoo kale khudbado ka jeediyay munaasabadda, iyaga oo mar kale xaqiijiyay sida ay uga go’an tahay taageerada ay siiyaan horumarinta hay’adaha amniga Soomaaliya.
Xafladdan ayaa calaamad u noqotay dadaalka isdaba-jooga ah ee lagu dhisayo ciidan boolis oo xirfad iyo karti u leh la tacaalidda caqabadaha amni ee dalka, iyadoo tababarkani uu sii xoojinayo xiriirka walaaltinimo ee ka dhexeeya Soomaaliya iyo Jabuuti.
