Israel ayaa si buuxda ula wareegtay dhul ballaaran oo ka tirsan Marinka Gaza, halkaas oo lagu tilmaamo mid ka mid ah meelaha ugu cidhiidhsan uguna dad badan caalamka. Tallaabadan ayaa keentay cabsiyo isa soo taraya oo ku saabsan xaaladda bini’aadantinimo ee shacabka Falastiiniyiinta.
Wasiirka Difaaca Israel, Israel Katz, ayaa Arbacadii ku dhawaaqay in ciidamada Israel ay u beddeleen ilaa 30% gudaha Gaza “goobo xadka ka xiran” ama buffer zones, taas oo sababtay in boqolaal kun oo Falastiiniyiin ah ay guryahooda ka barakacaan.
Agnes Levallois, oo ah khabiir ka tirsan Machadka Faransiiska ee Cilmi-baarista Istiraatiijiga ah, ayaa sheegtay in Israel ay u muuqato mid si ula kac ah u abuuraysa meelahaas sidii dhul cidlo ah oo aan dib loogu noqon karin. “Ujeeddada Israel ee Gaza waxay u muuqataa mid cad: in laga dhigo meel aan lagu noolaan karin,” ayay tiri.
Falanqeeyayaal kale oo caalami ah ayaa sidoo kale muujiyay walaac, iyaga oo sheegay in Israel hadda gacanta ku hayso in ka badan 30% dhulka Gaza, taasoo halis weyn ku ah dib u soo celinta dadka ku barakacay dagaalka.
Khariirado cusub oo uu soo saaray milatariga Israel ayaa muujinaya in dhul gaaraya 185 kiiloomitir oo laba jibbaaran—taas oo u dhiganta ku dhawaad kala bar guud ahaan dhulka Gaza—ay haatan si buuxda ula wareegeen ciidamada Israel.
Sidoo kale, Israel ayaa dhistay xayndaab amni oo cusub oo ku teedsan xuduudaha Gaza ee ay la wadaagto Israel iyo Masar, kaas oo si gaar ah loogu talagalay in looga hortago isku dayada tahriibka iyo in Gaza loo xiro xagga Masar.
Tallaabooyinkan milatari ee Israel ay qaaday ayaa sii hurinaya walaaca laga qabo mustaqbalka Gaza, iyadoo bulshada caalamka ay ku baaqayaan in la ilaaliyo sharciga caalamiga ah iyo in la joojiyo ficillada si toos ah u saameynaya dadka rayidka ah.
