Booliska Bangladesh ayaa Khamiistii shaaciyay in Meghna Alam, oo 30 jir ah isla markaana horey u noqotay boqoradda quruxda dalkaasi, lagu soo oogay dacwad la xiriirta shirqool ay u dhigtay safiirkii hore ee Sacuudiga, si ay uga dhacdo $5 milyan oo doollar.
Meghna ayaa markii hore la xiray iyadoo aan wax dambi ah lagu soo oogin, iyadoo la raacayo xeer muran badan dhaliyay oo oggolaanaya in si aan xad lahayn loogu hayo eedeysaneyaasha xabsiga. Afhayeenka booliiska, Maxamed Taalebur Raxmaan, ayaa sheegay in hadda si rasmi ah dacwad loogu soo oogay, iyadoo lagu eedeeyay baad iyo cabsi gelin.
Sarkaal sare oo booliis ah, oo codsaday in aan la magacaabin, ayaa sheegay in Meghna iyo dad kale ay maleegeen qorshe ay diblomaasiga ku qasbayaan inuu bixiyo lacagtaasi, taasoo khatar gelin karta xiriirka diblomaasiyadeed ee Bangladesh iyo Sacuudiga. “Bangladesh waa dalka ugu shaqaalaha badan ee jooga Sacuudiga. Dowladda ma dooneyso inay khatar geliso xiriirkaasi,” ayuu yiri sarkaalku.
Meghna Alam ayaa maxkamad hortimid Khamiistii iyadoo aan wakiil sharci ah wadan, waxayna diidday dhammaan eedeymaha loo jeediyay. Wargeyska The Daily Star ayaa qoray in ay sheegtay in diblomaasigu isagu la soo xiriiray oo uu ka codsaday inay xiriir bilaabaan. Aabbaheed, Badruul Alam, ayaa sidoo kale sheegay in labadooda ay xiriir lahaayeen, balse gabadhiisu ay diidday dalabka guur maadaama uu ninkaas horey u qabay xaas iyo carruur.
Booliska ayaa sheegay in markii la xiray 9-kii April ay ku eedeeyeen “khatar gelinta amniga qaranka” iyo “dhibaato u geysatay danaha dhaqaale ee dalka”. Xarigeeda ayaa si weyn u dhaleeceeyay ururada u dooda xuquuqda aadanaha.
Hay’adda Amnesty International ayaa ugu baaqday dowladda Bangladesh in Meghna lagu soo oogo dambi si caalami ah loo aqoonsan yahay, ama xorriyaddeeda si degdeg ah loo siiyo. Safaaradda Sacuudiga ee Dhaka ayaan weli ka jawaabin weydiimo arrintan la xiriira.
