Guddoomiyaha Hay’adda Maareynta Musiibooyinka Maxamuud Macallin Cabdulle ayaa xarunta dhexe ee Hay’adda SoDMA ku soo dhoweeyay madaxa hay’adda Cunnada Adduunka (WFP) ee Bariga Afrika Md. Laurent Bukera.
Kulanka labada masuul ayaa si dhaw loogu falanqeeyay xaaladda banii’aadannimo ee dalka, sidii ay wada-shaqeyn dhow u yeelan lahaayeen hay’adaha ka shaqeeya arrimaha gargaarka iyo abuuridda jawi u fududeynaya bahwadaagta howlaha gargaarka in ay waajibaadkooda si fudud u gutaan.
Guddoomiyaha Hay’adda SoDMA Maxamuud Macallin ayaa ka codsaday Laurent Bukera oo booqashadiisu kusoo aaday iyadoo laga cabsi qabo natiijo taban oo ka dhalata abaarta in Hay’adda WFP si dhaw ula shaqayso hay’adda SoDMA iyo Wasaaradaha Gargaarka iyo Maaraynta Musiibooyinka ee dowlad goboleedyada dalka.
Guddoomiyaha ayaa bogaadiyay xiriirka shaqo ee ka dhaxeeya SoDMA iyo WFP ayaa guud ahaan hay’adaha gargaarka iyo deeq-bixiyayaasha ugu baaqay in indhaha lagu hayo xaaladda abaareed ee dalka ka taagan.