Maamulka Jubbaland ayaa ku dhawaaqay qorshe ballaaran oo lagu abaabulayo, lagu diiwaangelinayo, lana isku dubaridayo ciidankeeda ku sugan Gobolka Gedo. Arrintan ayaa imaanaysa xilli uu sii xoogeysanayo khilaafka u dhexeeya Jubbaland iyo Dowladda Federaalka Soomaaliya, gaar ahaan gobolka Gedo.
Qoraal kasoo baxay madaxtooyada Jubbaland, oo maamulkaas aan si buuxda looga aqoonsaneyn sharciyadiisa, ayaa lagu sheegay in ciidanka gobolkaasi si degdeg ah loo diyaarin doono. Sidoo kale, qoraalka ayaa tilmaamay in ciidamo cusub lagu soo dari doono kuwa hore ee ku sugan gobolka Gedo.
Madaxweyne ku xigeenka 1-aad ee Jubbaland, Mohamud Sayid Aden, ayaa magacaabay guddi gaar ah oo ka shaqeyn doona abaabulka, diiwaangelinta, iyo isku dubaridka qeybaha kala duwan ee ciidanka Jubbaland ee gobolka Gedo.
Qoraalka ayaa lagu xusay in ciidankan loo diyaarinayo la dagaallanka Al-Shabaab (AS), balse qaar ka mid ah falanqeeyayaasha siyaasadda ayaa rumeysan in abaabulkan uu qeyb ka yahay qorshe lagu wiiqayo saameynta Dowladda Federaalka ee gobolkaasi.
Gobolka Gedo ayaa horay u ahaa goob ay ku dagaalameen ciidanka Jubbaland iyo kuwa Dowladda Federaalka, waxaana dagaalladaasi sababeen khasaare xooggan oo naf iyo maalba leh.
Waxaa xusid mudan in ciidamo Itoobiyaan ah ay qeyb ka ahaayeen dagaalladaasi, iyagoo garabsiinayay maamulka Axmed Madoobe, oo Dowladda Federaalka ay ku eedeysay inuu sharci darro ku joogo xukunka.
Xaaladda gobolka Gedo ayaa ah mid mar kasta xiisad cusub dhalin karta, iyadoo khilaafka Jubbaland iyo Dowladda Federaalka uu weli xal rasmi ah loo helin. Waxaa la sugayaa sida qorshahan cusub uu u saameyn doono gobolka iyo guud ahaan xaaladda amni ee Jubbaland.