Madaxweynaha Kuuriyada Koonfureed, Yoon Suk Yeol, ayaa xilka ka xayuubiyay Baarlamaanka dalkaasi, kaddib markii codsi xil-qaadis ah oo ay taageereen xisbiyada mucaaradka uu meel mariyay. Tallaabadan ayaa ku timid kadib go’aan muran dhaliyay oo uu madaxweynaha ku soo rogay sharciga dagaalka, taasoo si degdeg ah loo laalay, taasoo kicisay falanqayn ballaaran oo siyaasadeed.
Codsiga xil-qaadista ayaa ansaxay markii ugu yaraan 12 xubnood oo ka tirsan Xisbiga Awooda Dadka ee Yoon ay ku biireen xisbiyada mucaaradka.
Xisbiyada mucaaradka ayaa gacanta ku haya 192 kursi oo ka tirsan baarlamaanka 300 xubnood leh, taasoo ka caawisay in la gaaro heerka labo-meelood meel ee looga baahan yahay si codsiga xil-qaadista loo ansaxiyo.
Tallaabadan ayaa ka dhigan in baarlamaanka uu taageeray codsiga xil-qaadista, iyadoo uu fursad u helay mucaaradka inay si rasmi ah xilka uga qaadaan madaxweynaha.
Xiisadaha siyaasadeed ee dalka ayaa sii kordhaya, iyadoo dadka dhaliila Yoon ay ku doodayaan in tallaabada baarlamaanka ay tahay mid xad-gudub ku ah awoodda madaxweynaha iyo hannaan dowladeed ee dalka.
Dadka taageersan madaxweynaha ayaa dhankooda rumeysan inay tani tahay isku day siyaasadeed oo lagu hanan karo awooda siyaasadeed ee dalka.
Saameynta xil-qaadista ayaa noqon doonta mid si weyn u taabaneysa hoggaanka Yoon iyo muuqaalka siyaasadeed ee Kuuriyada Koonfureed, waxaana suurtogal ah inay sii kordhiso xiisadaha ka dhex jira xisbiyada dowladda iyo mucaaradka, iyada oo laga yaabo in siyaasadda dalka ay isbedel weyn ku timaado.
Dhibaatooyinkan ayaa sidoo kale saameyn ku yeelan kara xiriirka dalkaasi la leeyahay beesha caalamka, gaar ahaan waddamada Aasiya iyo kuwa Galbeedka.
