Wararka naga soo gaaraya Gobalka Jubbada Hoose ayaa xaqiijinaya in dagaal culus uu saaka aroornimadii dhex maray ciidamada Jubbaland iyo kuwa dowladda Federaalka ee dhawaan la geeyay gobolkaasi.
Dagaalka ayaa billowday kaddib markii ciidanka Jubbaland, oo ka amar qaata hoggaamiyaha maamulkaasi Axmed Madoobe, ay weerar ku qaadeen fariisimo ay ku sugnaayeen ciidamada dowladda Federaalka.
Sida ay wararku sheegayaan, dagaalka ayaa ilaa saddex jeer la isku soo celceliyay, iyadoo ugu dambeyn ciidanka Jubbaland dib looga riixay goobihii ay weerarka ku soo qaadeen.
Degmada Waraabale oo hoos timaada Buurgaabo ayaa la xaqiijiyay inay hadda ku sugan yihiin ciidamada dowladda Federaalka, halkaasoo ay fariisin adag ka sameysteen.
Khasaaraha dagaalka ayaa ah mid baaxad leh, iyadoo xogaha aan helnay ay sheegayaan in ugu yaraan saddex gaadiid oo uu lahaa maamulka Jubbaland lagu gubay dagaalka.
Labada dhinac ayaa la rumeysan yahay inay soo gaareen khasaare xooggan oo dhimasho iyo dhaawac isugu jira, inkastoo tirada rasmiga ah aan weli la xaqiijin.
Xaaladda deegaanka ayaa iminka dagan, inkastoo laga cabsi qabo in xiisaddu dib u qaraxdo mar kale, maadaama ay labada dhinac wali isku horfadhiyaan goobaha dagaalka.
Wixii warar ah ee ku soo kordha, kala soco wararkeena dambe.