Xildhibaan Xasan Maxamed Firimbi ayaa raalli-gelin ka bixiyay dhacdo uu 27-kii November ugacan qaaday askari ka tirsan ilaalada Xarunta Golaha Shacabka, gaar ahaan Isbatoore Xuseen Maxamed Xasan. Raalli-gelinta ayaa ka dhacday kulan gaar ah oo lagu qabtay Xarunta Golaha Shacabka ee Villa Hargeysa, iyadoo ay goob joog ka ahaayeen qaar ka mid ah xildhibaanada Golaha Shacabka.
Dhacdadan ayaa sababtay dhaleeceyn xooggan oo loo jeediyay Xildhibaan Xasan Firimbi, kadib markii lagu eedeeyay inuu feeray askariga xilli uu ku guda jiray shaqadiisa ilaalinta xarunta. Marka uu falkaasi dhacay, ayaa la sheegay in xildhibaanku ka waday xarunta Baarlamaanka fowdo iyo qalalaase.
Kulankii lagu raalli-gelinayay askariga waxaa lagu tilmaamay tallaabo lagu soo afjarayo xiisadda arrintan ka dhalatay, waxaana dhinacyadu ku heshiiyeen in la xalliyo arrinta si degdeg ah.
Dhacdadan ayaa soo jiidatay indhaha bulshada, iyadoo si weyn loogu cambaareeyay falkaas, laguna baaqay in xildhibaannada ay ixtiraamaan howlaha iyo shaqaalaha amniga ee ku sugan xarumaha dowladda.
