Maamulka gobolka Bari, taliska qaybta Booliska iyo maamulka degmada Boosaaso ayaa digniin adag u diray wadayaasha gaadiidka, iyagoo ku eedeeyay in ay si ula kac ah bulshada barakicinayaan si ay dhaqaale uga faa’iidaan. Mas’uuliyiinta ayaa ka digay in falalka noocan ah ay kicin karaan xaalad amni-darro, isla markaana ay saameyn taban ku yeelan karaan dadka shacabka ah oo mar horeba dhibaatooyin kala duwan la daalaa dhacayey.
Guddoomiyaha gobolka Bari iyo duqa magaalada Boosaaso ayaa caddeeyay in xaaladda magaalada ay deggan tahay, balse ay jiraan kooxo isku dayaaya inay ka faa’iideystaan duruufaha qaar si ay dhaqaale uga macaashaan. Waxay intaa ku dareen in maamulka gobolka iyo degmada ay qaadi doonaan tallaabo sharci ah oo degdeg ah cidkasta oo lagu helo inay qayb ka tahay ficilada lagu barakicinayo shacabka, iyagoo kaashanaya hay’adaha amniga sida booliska iyo ciidamada PSF.
Sidoo kale, Taliska Ciidanka PSF (Puntland Security Force) ayaa shalay si toos ah ugu baaqay shacabka ku nool xaafadaha ku teedsan garoonka diyaaradaha Boosaaso inay halkaasi isaga guuraan sababo la xiriira qorshaha amniga ee lagu sugayo goobaha muhiimka ah. Baaqan ayaa sababay in wadayaasha gaadiidka qaarkood ay ku dhaqaaqaan daadgureynta dadka ka barakacaya xaafadahaasi, iyagoo ku eedeeysan in ay qiimeyaal sare ka dalbadeen dadka si ay uga caawiyaan in ay ka guuraan guryahooda.
Mas’uuliyiinta ayaa ku celceliyay in barakicinta iyo tacaddiyada noocan ah aysan waxba ka jirin oo ay tallaabo adag ka qaadi doonaan dadka isku dayaaya inay dhibaatada sii xoojiyaan. Taliska booliska iyo ciidamada amniga ayaa si dhow ula socda xaaladda, iyagoo qorsheynaya hawlgallo ballaaran oo lagu xaqiijinayo in amniga magaalada la ilaaliyo, isla markaana shacabka la siiyo taageero iyo badbaado.