Ra’iisul Wasaare Ku-Xigeenka Xukuumadda Federaalka Soomaaliya, Mudane Saalax Axmed Jaamac, ayaa guddoomiyay shirka isku dubaridka barnaamijka xasilinta. Shirkan ayaa diiradda lagu saaray horumarradii laga sameeyey barnaamijka xasilinta ee ay dowladda hoggaamiso, kaas oo loogu talagalay in lagu gaarsiiyo adeegyada bulshada, maamul-dhiska, iyo amniga iyo caddaaladda deegaannadii dhowaan laga xoreeyey argaggixisada.
Intii lagu guda jiray shirka, waxaa laga dooday guulaha la gaaray iyo caqabadaha ka hor yimid barnaamijka xasilinta, waxaana lagu lafa guray qaababka ugu habboon ee loogu sii wadi karo horumarinta adeegyada bulshada. Barnaamijka xasilinta ayaa ah mid muhiim ah oo diiradda saaraya sidii loo hubin lahaa in deegaannada laga xoreeyey argaggixisada ay helaan adeegyada aasaasiga ah sida waxbarashada, caafimaadka, iyo biyaha, si loo xoojiyo xasilloonida iyo nabadda bulshada deegaankaas ku nool.
Mudane Saalax Axmed Jaamac ayaa ku boorriyay dhammaan hay’adaha ku shaqada leh barnaamijka xasilinta inay sii xoojiyaan dadaalladooda, isla markaana ay iska kaashadaan sidii loo gaari lahaa yoolalka la hiigsanayo. Wuxuu sidoo kale adkeeyey muhiimada ay leedahay in bulshadu ka qayb qaadato dadaallada nabadgelyada iyo horumarinta, si loo xaqiijiyo in guulaha la gaaro ay noqdaan kuwo waara.
Shirkan ayaa qayb ka ah dadaallada joogtada ah ee dowladda federaalka Soomaaliya ay ku doonayso in lagu xoojiyo hay’adaha dowliga ah iyo maamulka heer deegaan, taas oo ka caawin doonta in la dhiso bulsho nabad ah oo horumarsan. Horumarinta barnaamijka xasilinta ayaa sidoo kale loo arkaa mid ka mid ah furaha lagu gaari karo nabad waarta iyo horumar waara oo Soomaaliya ay ku tallaabsato.
Hoos ka daalaco sawirada kulankan,muhuma u ah geedi socodka Dowlada
