Diyaarado nooca aan duuliyaha laheyn ee loo yaqaan Drones-ka ayaa Maanta waxay duqeymo ka fuliyeen deegaano ku yaalla xadka Gobolada Shabeellaha Dhexe iyo Hiiraan ee Maamulka Hirshabeelle, halkaasi oo la sheegay inay ku sugnaayeen Al-Shabaab.
Wararka la helayo ayaa sheegaya in duqeynta ay ka dhacday deegaanka Fiidow oo ku yaalla xadka labada gobol, isla markaana sida la tilmaamay lala beegsaday dagaalyahano ka tirsan Al-Shabaab oo joogay goob.
Saraakiil ka tirsan ciidanka xoogga dalka oo la hadlay Warbaahinta ku hadasha Afka dowladda ayaa sheegay in duqeymaha diyaaradeed lagu dilay ugu yaraan 10 xubnood oo ka tirsan Al-Shabaab oo isugu jiray dagaalamayaal iyo Saraakiil.
Sidoo kale saraakiisha ayaa intaas kusii daray in khasaaro dhaawacyo ah ay ka dhasheen duqeynta, in kastoo dowladda Federaalka Soomaaliya aysan faah faahin ka bixin howlgalka ka dhacay deegaano ku yaalla xadka Gobolada Shabeellaha Dhexe iyo Hiiraan.
Dowladda federaalka Soomaaliya oo taageero ka helaysa dadkeeda iyo saaxiibada caalamiga ah ayaa horey u sheegtay inay ka go’an tahay sii wadida howlgalka ka dhanka ah Shabaab ee ka socda qeybo kamid ah Gobolada dalka.
