Shil gaari oo sababay khasaaro isugu jira dhimasho iyo dhaawac ayaa goor dhow Maanta oo khamiis ah ka dhacay deegaan duleedka ka ah magaalada Garoowe ee xarunta Gobolka Nugaal, sida ay sheegayaan wararka aan halkaasi ka heleyno.
Dad ayaa waxa ay kusoo warrameen in shilkaasi uu ka danbeeyay, kadib markii uu gaari ay saarnaayeen dad shacab ah oo ku socday xawaare sare uu mar qura wadada ka baxay, isla markaana uu rogmaday gaarigaasi oo ahaa nooca yaryar.
Inta la xaqiijiyay laba ruux ayaa ku geeriyooday shilka gaari oo ka dhacay nawaaxiga degaanka 22-aad ee dhinaca bari ka xiga magaalada Garoowe ee caasimadda dowlad goboleedka Puntland, halka ay ku dhaawacmeen dad kale oo tiro ahaan aan la shaacin.
Marar badan oo hore ayaa waxaa sidaan oo kale duleedka Garoowe uga dhacay shilal gaari oo dhowr ah, kuwaasi oo geystay khasaaro nafeed, inta badan shilalkaasi ayaa loo sababeeyaa gaadiidka oo xawaare sare loo kaxeeyo iyo waddooyinka qaarkood oo ah kuwo burbursan.