Taliyaha Nabad-sugidda dowlad Goboleedka Hirshabeelle Macallin Yuusuf iyo saraakiil ka tirsan Booliiska ayaa ku baxay dagaal beeleed saacadihii lasoo dhaafay ka dhacay deegaano hoostaga degmada Mahadaay ee Gobolka Shabeellaha Dhexe.
Taliye Macallin Yuusuf iyo ciidamo uu hoggaaminayay ayaa gaaray inta u dhaxeysa deegaannada Qurac-madoobe iyo Aqab-duco oo hoostaga Mahadaay, halkaasi oo shalay laba maleeshiyo beeleed uu ku dhexmaray dagaal khasaaro dhaliyay.
Taliyaha iyo saraakiil ka tirsan ciidanka Hirshabeelle ayaa si gaar gaar ah ula kulmay dhinacyada dagaalku dhexmaray, iyagoo ka codsaday in colaadda la joojiyo, si aan mar kale deegaannada loogu dagaalamin oo dhiig kale u daadan.
Wararka ayaa intaas kusii daraya in dhinacyada la kala dhex-dhigay ciidamo, si ay u joojiyaan dagaalka, xaaalada deegaannada Qurac-madoobe iyo Aqab-duco ayaa haatan dagan, mana jirio wax dagaal ah oo Maanta halkaasi ka socda.
Dagaalka ayaa sababay dhimasho iyo dhaawac, waxaana inta la ogyahay dagaalka ku dhaawacantay illaa saddex ruux, halka qof kalena la tilmaamay inuu ku naf-waayay, waxaana dhaawacyada la keenay mid kamid ah Isbitaalada ku yaalla Muqdisho.
Muddooyinkii ugu danbeeyay ayaa waxaa deegaano ka tirsan Gobolka Shabeellaha Dhexe kusoo laab-laabanayay dagaal beeleedyo u dhexeeyay maleeshiyaad hubeysan oo Gobolka wada-daga, waxaana dagaalada qaarkood lagu guuleystay in la joojiyo .