Taliyaha hay’adda Nabad Sugidda iyo Sirdoonka Qaranka Soomaaliyeed Mahad Mohamed Salaad ayaa Soo dhaweeyay go’aanka Golaha Amaanka Qaramada Midoobay ay kaga qaadeen dalkeena Cunaqabataynta Hubka oo muddo dheer saarnayd.
War-saxaafadeed uu soo saaray Agaasime Mahad Salaad ayuu ku sheegay in Go’aanka looga qaaday Soomaaliya Cunaqabataynta Hubka uu kusoo aaday waqti muhiim ah, isla markaana dowladda Federaalka ay dagaal kula jirto dagaalamayaasha Al-Shabaab.
Sidoo kale Agaasime Mahad Salaad ayaa Madaxweynaha Jamhuuriyadda Federaalka Xasan Sheekh Maxamuud, Ra’iisul Wasaaraha Xukuumadda iyo mas’uuliyiinta kale ee dowladda uga mahadceliyay kaalinta ay ka qaateen guusha la gaaray.
Golaha Ammaanka ee Qaramada Midoobay ayaa xalay dalka Soomaaliya ka qaaday Cunaqabataynta Hubka ee saarneyd mudada badan, waxaana Cunaqabataynta Hubka dalka la saaray sanadkii 1992-dii, xilligaas uu dalka kusoo qul-qulayay hub sharci darro ahaa.
