Cali Jeyte Cismaan oo ah u Qeybsanaha Xafiiska Madaxweyne ee Arrimaha Ciidanka Difaaca Dadweynaha (Macawisleyda) ayaa ku dhawaaqay dagaal cir iyo dhul ah oo ay ku qaadi doonaan dagaalamayaasha Al-Shabaab ee ku sugan qeybo kamid ah Gobolka Hiiraan ee Maamulka Hirshabeelle.
Cali Jeyte oo Warbaahinta la hadlay ayaa waxaa uu sheegay in Al-Shabaab ay dib ugu soo laabanayaan deegaanadii laga xoreeyay sanad ka hor, isla markaana maalmihii lasoo dhaafay isku uruursanayeen deegaano ka tirsan Gobolka Hiiraan, sida wararka sheegayaan.
Wuxuu hadalkiisa intaas uu kusii daray Cali Jeyte Cismaan in dadka kunool deegaannada ay Shabaab gacanta ku hayaan ay isaga soo baxaan, isagoo tilmaamay inay halkaasi ka fulin doonaan dagaal cir iyo dhul ah, waa sida uu hadalka u dhigay Cali Jeyte Cismaan.
Hadalkaan kasoo yeeray hoggaamiyaha Macwiisleyda ayaa noqonaya digniintii labaad oo mudo kooban gudaheed uu u dirayo dadka shacabka ah ee ku nool dhulka Al-shabaab ka taliyaan, isagoona faray iney isaga guuraan deegaan kasta oo uu sheegay inuu yahay bartilmaameed.
Si kastaba, muddooyinkii ugu danbeeyay ayaa waxaa hakad galay howlgaladii ka dhanka ahaa Al-Shabaab oo ay waday dowladda Federaalka Soomaaliya, waxaana Madaxda dowladda ay dhowr jeer sheegeen inay dib u bilaabayaan wejiga labaad ee howlgalada.